Curfew
Woh subah roj ki tarah nahi thi. Raste par shorgul, bhid bhadaka aur dukan sari ab bhi khuli nahi thi. Sadke bi khali lag rahi thi bina gaadio ke. Bachhe khush ho rahe the kyon ki school nai jana tha. Unhe kya pata tha chutti kyo thi aaj. Police ki gaadiya kuch bas aa ja rahi thi aur kuch utsahit log jo milkar vichar vimarsh kar rahe the unhe bhaga rahi thi.
In sab ke bich ek insaan chala ja raha tha sadak pe- Bhura. Woh har dukaan ko dhyan se dekhte hue ja raha tha. Ratse me Pipal ke ped niche kuch log apni motorcycle ke saath khade the. Ek naujavan sabko suchna de raha tha garv ke saath "Aaj to do sarkari bas jala di aur bi sara chakkajam kar diya, maza aa gaya ". uski baato se lag raha tha jaise manav jagat ke liye bahot bada yogdaan diya ho. Wohi ek adhed bola usi mandal me se "Ye to kuch nai hai, jab ham log college me the, Tab to Sare sarkari daftar me bhi todfod macha dete the". Wohi ek yuvak Grahak Suvidha kendra me sampark karne ki koshish kar raha tha jaha se jawab aaya " sarkari Agency ke nirdesh anusar aapke kshetra me data aur sms seva uplabdh nahi hai. Hamari jald se jald seva shuru karne ki aasha hai". Phone kaat te hue yuvak ne kaha "Arre yaar. Abhi whatsapp bhi nai chal raha, nai to pura photos sab ko bhej deta. Pata to chale sarkar ko ham me bhi kitna dam hai. Ha ha". Charcha gambhir hone lagi. Ek budhijivi sab ko samjane lage "Ye sab rajkaran hi hai. Ye digital Yug me sara power telecom ke paas hai. Aur telecom sarkar ke haath me. Sare movement ko kaise dabana hai ye unhe achi tarah aata hai. Capitalism me yahi hota hai". Ek majdoor jo kisi dusre rajya se aaya hua tha roji roti kamane woh toli ko dekh puchne laga "Aaj Strike hai kya?" Sab log hasne lage. Ek mahashay bole "Ye lo. Duniya se bekhabar. Yaha aag lagi hui hai aur ye puch rahe hai strike hai?. Ha ha. Ha bhai aaj bandh hai. Ghar jao wapas". Woh majdoor apni mayushi antar man me chupakar chala gaya. Wohi sab ki nazar Bhura pe padi. Ek hoshiyar vyakti ne haath se ishara karte hue dhaad mari "Oye..Kaha ja raha hai???" Bhura nazdik aake bola "Dairy khuli hogi aas paas kahi?" Wohi utsahit yuvak ne jawab diya "Abe murakh. Aaj bandh hai sab. Kuch nai khula hai. Ghar ja nai to kuch hi der me police logo ko danad maar haga degi" Bhura ja hi raha tha tab ek sajjan ne kaha "Agli gali me tisra ghar hai. Uski dukaan ka shutter bandh hoga. Par baju me chota darwaja khol ke jana, piche hi uska ghar hai" Bhura dhanyvad keh ke nikla aur dairy pe pahoncha. Usne 15 rs ka Doodh liya aur chupchap apne ghar wapis aaya.
Ghar me ghuste hi myaw myaw ki awaaz aane lagi. Bhura doodh ki theli daan se hi tod bahar rakhi katori me sara doodh daal diya. Uski patni bahar aake gusse me boli "Sheher me dange ho rahe hai aur aap bina soche ye lene gaye the". Bhura kuch nai bolta bas billi ko doodh pite dekhte rehta hai. Jab patni chillake kehti hai "Curfew laga hai, smajte ho na iska matlab?". Bhura kehta hai "Mai to samjta hu, par ye bezubaan billi kaha samjhegi. Kabhi sochta hu ham jyada samjdaar hue insaan bankar ya jaanvar hue jyada samajdar bankar".
Copyleft © Jigar Raval
