Raat hone ke saath sama bhi kajal ki tarah gehra ho raha tha. Baarish ki boonde damar ki sadko pe girte hi malhar raag gunguna rahi thi. Chand gaadiya, do pahiya, cycle aur bagal me kuch chattriya chal rahi thi. Kudrat ki banaye vishram sthal ki aad me kuch log vicharo ke shailab me baarish ki tivrata kam hone ka intezar kar rahe the.
Usi me se raste pe ek gaadi sanp sidhi khelte hue aage badh rahi thi. Shihe par thirkte vipers andar baj rahe radio ke saath taal mila rahe the. Steering ko ek haath se disha nirdesh karte hue yuva apni dhun me ja raha tha. Ungliyo se battiya kam jyada karne ke saath aas paas nigahe fer kuch dhundh raha tha. Khushiyo ki window shopping pe nikle yuva ko aakhir kar manzil mil hi jati hai. Sadak kinare gaadi rok niche utarata hai. Bhag ke sidha chajje ke niche khada ho jata hai aur bina piche mude ek button dabata hai jis se gaadi me kuch dhvani aur timtimati roshani hoti hai, Jo gaadi surakhsit hone ka sanket deti hai. Paas me dukan ke baramde pe ek shakhs betha hai. Shehro ki naaliyo me bhigokar nikale hue kapde, rajtantra ki tarah ulze hue ghumrale aur sarkari vaydo samaan lambe baal, bhrashtachar jaisi badhi hui daadhi aur nyay vyavastha jaisa kamzor sharir. In sab ke bavajud fakiri ki gavahi dete hue chehre pe sufiyana muskaan. Apni gehri ankho se bahot kuch kehte aur sunte hue woh yuva ko dekh raha tha. Pahad si majbut aavaz me kuch shabd nikle uske mukh se "kuch khane ko hai kya?" Yuva tiraskar se jyada kataksh bhari nazaro se dekh haath hilate hue jaise suna hi na ho waise aage badha. Choti choti roshani ki ladiya sab ka swagat karte hue kuch alfaz ke ird gird daud rahi thi. Baar baar girgit ki tarah rand badal rahi thi, halaki fir bhi kuch insaano ki rang badlne ki gati ko maat nai de pa rahi thi. Laal rang me chamkte lohe ke saliyo ki karigari se pravesh niyantrit kiya gaya tha. Do insaan andar ki taraf shisho ki bottlo ko idhar udhar kar rahe the. Yuva ne apne jeb me do kagaz ke tukde nikale aur ek usme se us vyakti ke haath me thama diya. Vyakti badi namrata se tukde ko lekar ek chamkti hui shishe ki bottle lekar aaya aur saliyo ke us paar yuva ke haath me de di. Saath me kuch aur kagaz ke tukde bhi wapis diye. Yuva use lekar aaya us se dugni raftar me chala gaya.
Kuch der baad paristhiti karvat leti hai. Saliyo ki sajavat sidhi Saadi lakiro ki tarah aur fike hare rang si mayush hai. Ek aviksit chetna jaisa vajandaar taala laga hua hai bahar ki taraf. Yuva andar ki taraf hai is baar aur char panch log bahar ki taraf thahake laga rahe hai. Yuva apni bachi hui shaktiyo ko jodte hue himmat juta ta hai aur kuch alfaz nikal jate hai. Ek adhikari aata hai salakho ke paas. Yuva fir se jitne bhi kaagaz ke tukde the sab use arpit kar deta hai, par is baar saliyo ke us paar se. Adhikari usi thekedar ki mafik haste hue tukde grahan kar leta hai. Tala khulta hai, aur yuva lambi saans letkar bas chal padta hai vaha se.
Gali me juto ko ghasit te hue chalne ki koshish ab bi jari thi. Baarish kuch kam hui fir bi bhig raha tha woh yuva. Usi bich ek sarkari daftar ke angan me aasra leta hai. Waha use wohi fakir betha hua Milta hai. Yuva bina kuch bole cement ki theli se bani hui kaalin pe birajta hai. Fakir use fir se gehri nazar se dekhta hue muskurara hai. Ek pudiya nikalta hai jhole me se aur yuva ko deta hai. Yuva use lekar haath ponchte hue khane lagta hai. Aakhir me murzaye fool ki tarah, silvate pade hue pudiya ke kagaz ko kholta hai to tel ke dhabbo me kuch dikhayi deta hai. Kagaz arthik mudra ke chalan ke hubahu Chitra prastut kar raha tha, nichd kisi kitab ka ka visleshan tha jisme chote akshar me likha tha "Think and grow rich". Ek kone me kuch panktia likhi hui thi. Shirshak tha "Madhushala". Yuva kagaz ke tukde ko maslte hue fakir ko dekhta hai. Fakir ab bi wohi mukt Nirmal hasya bikher raha tha. Yuva hasta hai. Par is baar digitally suniyantrit ki hui yojna ke tahet nai, bina hasne ki koshish kiye, bas fakir ke bikhre hue hasya ke tukde samete has padta hai.
Copyleft © Ghumantu
No comments:
Post a Comment