Kodvu ke junglo me basa hua ek kasba. Savere hote hi ahladak nazara. Paschimi ghat ki pahadiya jaise hari chadar odhe bethi hai aur shardi me ubasi lete hue sanso se niklta hua dhnua. Sahelani dhund ko mehsus karte to aisa lagta jaise pahadi tulsi ke patte chabakar taza hava de rahi ho. Bazar me halki si chehal pahal ke bich tejana aur masale ki bikri karti hui dukane.
Raat ko yahi Bazar shant sa lagta hai. Kuch sarkari bus yatayat ke liye khadi hui aaram farma rahi hai. Thodi bahot battiya jameen pe jal rahi hai Jo aasman ke jagmagate taro se barabari ka dava karti ho mano. Ek ghumantu kuch khojte hue inhi galiyaro me aa pahoncha. Nukkad pe do vyakti ko khade dekh pucha "Bhaisaab, yaha khana kaha milega aas paas? " samne palat kar tasalli karte hue woh vyakti ne pucha "khana"? Aur fir isharo se samjaya jisme tin manjila makan ka zikra tha. Ghumantu bataye raste ko kanthast karke aakhirkaar pahonch hi gaya.
Ek bada sa darwaza jis ke bayi taraf ek bhari insaan bethe hue the. Haath me kuch rupyo ki gaddi thi jise gin rahe the. Sar pe gol jaalidar topi pehne hue the aur ghumantu ko dekh muskurakar bole " Come come". Ghumantu thoda hichkichaya waha ki diwar pe likha tha woh padh ke, par fir anadar aa hi gaya. Usne nazar daudate hue kone me sthir kiya aur wahi jakar sthan grahan kiya. Aaspaas dekha to khane ki mehfil chal rahi thi jise dekh thoda aswasth hua woh. Isi bich ek hust-pusht lamba insaan aakar samne khada ho gaya. Maze pe ulta rakha hua pani ka glass sidha karke pani bharte hue bola "kya loge sir"? Ghumantu aas paas dekh kar thoda bechen ho raha tha Jo uske kanpte hotho se jhalak raha tha. Usne dabe hui awaaz me pucha "kuch veg milega?? " woh vyakti ghumantu ke gale me mala aur haath pe bandhe dhago se hi samaj gaya ki kya chal raha hai uske dimag me. Woh muskueate bola "2 minute bethie" . woh wapis aaya aur bola chaliye. Upar dusri manzil ki sidhiya chadhne laga aur piche hi ghumantu. Upar aate hi ek chota sa kaksh tha Jo teen baju se bandh tha. Usne ghumantu ko bethne ke liye bola aur kaha " sir ye alag jagah hai jaha log pine aate hai" ghumantu samaj gaya ki yaha madirapaan karne log aate hai. Usne kaha" aap aaram se bethie yaha sir. Rice chalega? " apni gardan hilate hue ghumantu ne ha bola. Kuch hi der me khana le aaya woh. Ghumantu ne itminaan se khaya aur bill dene ko kaha. Aakhir me saunf ka zayka lete hue ghumantu ne pucha "Naam kya hai tumhara"? Jawab dete samay kuch pal woh ruk gaya aur fir uski ankho me ek chamak aur chehre pe sukun tha. Woh dhire se bola "Mai church jata hu sir " dono muskuraye. Ghumantu kshobh me has pada. Sidhi utar ke jab niche aaya to woh topi vale janab puch rahe the " food?? Good na?? " Ghumantu ne angutha uthate ishara kiya. Bahar niklte samay ghumantu kuch sun ke khilkhilakar hasa. Koi mahanubhav subah ke akhbaar ki kuch baasi surkhiya gunguna rahe the "Intolerance rising"
No comments:
Post a Comment